Votojnë të burgosurit, ja si votohet në burgun e Shuto Orizares

0

“Sot është dita e dytë e zgjedhjeve parlamentare, ku mes tjerash sot votojnë të burgosurit, ata në paraburgim dhe ata të cilët janë në arrest shtëpiak, sipas listës zgjedhore për të votuar janë regjistruar 1657 votues të tillë”, Valmira Zendeli, gazetare.

TV21 ishte në burgun e Shuto Orizarës për të parë se si po zhvillohet procesi i votimit. Sipas informacioneve që na kumtuan nga anëtarët e Këshillit Zgjedhorë procesi votimit po zhvillohet pa probleme, të burgosurit vijnë një nga një për të shfrytëzuar të drejtën e tyre.

Në mëngjes kanë votuar ata të cilët janë në paraburgim dhe pastaj ata të cilët janë të dënuar dhe vuajnë burgun.

Irina Ashiovska Zdravevska, zv/kryetare e Këshillit Zgjedhor shpjegoi procedurën e votimit.

“Vijnë me policinë, hyjnë brenda, tek llamba i verifikojmë nëse kanë votuar më herët ose jo, dezinfektohen, ua kërkojmë letërnjoftimin, i identifikojmë dhe i kërkojmë në lista, nënshkruhen dhe pastaj i marrin fletat e votimit, spërkasim me spërkatës, shkojnë mbrapa kutisë, votojnë dhe pastaj fletën e palosur e vendosim në zarf me vulë dhe për cilën komunë dhe pastaj e vendosin në kuti”, Irina Ashikovska Ydravevska, zv/kryetare e KKZ.

Sipas listës zgjedhore të KSHZ-së në burgun e Idrizovës, Shuto Orizërës dhe në Shtip ka më së shumti votues, siç janë:

Numri i votuesve të regjistruar në KSHZ

-Burgu Idrizovë ka 854 votues

-Burgu në Shuto Orizare 216 votues

-Burgu në Shtip, 205 votues

Ndërsa nëpër burgjet dhe shtëpitë korrektuese ka më pak votues të paraqitur.

Sipas protokollit nga KSHZ, fletat votuese të të burgosurve të vendosura në kutitë e votimit dërgohen në Komunat nga vijnë, dhe nesër kur të përfundoje procesi i votimit, së bashku me fletat tjera numërohen edhe votat e tyre. Në burgun e Shuto Orizarës të drejtën e votës e ka shfrytëzuar edhe Boki 13 i dënuar me 9 vjet burg në rastin Reket.