Presidenti i Serbisë, Aleksandar Vuçiq deklaroi mbrëmë se shërbimet e sigurisë janë në kërkim të dy snajperistëve në Beograd, pa specifikuar se cili mund të jetë objektivi i tyre. Deklaratën e dha për televizionin Prva, duke theksuar se gjatë ditëve dhe javëve të fundit në Serbi janë marrë informacione të ndryshme nga organet e sigurisë dhe inteligjencës, për të cilat publiku nuk është njoftuar.
“Aktualisht jemi në kërkim të dy snajperistëve në Beograd, të cilët e dimë se janë në qytet dhe nuk kemi mundur t’i gjejmë prej tre ditësh. Shpresoj se do të arrijmë ta bëjmë këtë. Kush janë ata dhe cilat janë objektivat e tyre – do ta shohim. Por dimë se kanë ardhur, dimë edhe nga kanë ardhur paratë, dhe besoj se shërbimet kompetente do të arrijnë ta zgjidhin këtë”, tha Vuçiq.
Ai shtoi se ekziston “vetëm një mënyrë për t’i mundur ata” dhe se çfarëdo ndryshimi i pushtetit nuk ofron zgjidhje.
“Kjo është rruga e tyre e vetme, nuk kanë tjetër mënyrë. Nuk mund të dobësojnë vullnetin tim, nuk mund të më mundin në zgjedhje dhe e dinë shumë mirë këtë”, shtoi ai.
Ai vlerësoi komentoi edhe tubimin në Novi Sad më 1 nëntor.
“Ata e bëjnë këtë për shkak të parave, jo për ide ose ideologji, sepse ato nuk i kanë. Por më pas nuk ndodhi dhe nuk do të ndodhë”, theksoi Vuçiq.
Duke folur për incidentet e djeshme në kampin e çadrave përpara Shtëpisë së Kuvendit, presidenti tha se njerëzit në Pionirski Park “u sulmuan pa asnjë arsye” dhe se dje ishin sulmuar shtatë zyra të SNS në Serbi.
