Refuzimi i ftesës së presidentit serb Aleksandër Vuçiç për t’iu bashkuar liderve evropianë dhe Ballkanit Perëndimor në samitin e procesit të Berlinit që u mbajt në Tiranë, nuk ka mbetur pa u komentuar.
Lideri serb ndërkohë ndodhej në Kinë, ku nuk i kurseu kritikat për Kosovën. Sipas deputetit gjerman, Reinhard Butikofer, me veprime të tilla, Vuçiç po ia tregon gishtin e mesit Bashkimit Evropian.
Ai ka cilësuar si të gabuara të gjitha këto veprime të Vuçiçit, përfshirë edhe aneksin e marrëveshjes së Brukselit, që, sipas kryeministrit Kurti, kryeministrja serbe Ana Bernabiç refuzoi ta nënshkruante.
“Serbia po i tregon BE-së gishtin e mesit: Vuçiq preferon të shkojë në Pekin; kryeministrja serbe refuzon t’i bashkohet fotos familjare, sepse refuzon të respektojë flamurin e Kosovës; dhe, natyrisht, ata nuk duan të nënshkruajnë një marrëveshje, të cilës nuk kanë ndërmend t’i përmbahen. Gjeni gabimin”, shkroi Butikofer.
Lëvizjet e fundit të Vuçiçit, i ka kritikuar të hënën edhe Raportuesja për Kosovën në Parlamentin Evropian, Viola von Cramon. Asaj nuk i ka shpëtuar fakti se presidenti serb, Aleksandër Vuçiç, e bojkotoi samitin e Procesit të Berlinit në Tiranë për të shkuar për vizitë në Kinë. Sipas von Cramon, ky është një sinjal për Bashkimin Evropian, ku presidenti i një shteti pretendent për të hyrë në BE bojkoton samitin.
