VV Denoncon Dardan Molliqajn për ‘Mbledhje Ilegale’ me Aktivistë

Lëvizja Vetëvendosje lëshoi një komunikatë në të cilën tha se ish sekretari organizativ i kësaj partie, Dardan Molliqaj, po mbledh aktivistët e saj në takime që i quajti ilegale duke u folur për, siç thuhet, ndarje të VV-së dhe krijimin e një partie të re.

“Disa aktivistë dhe anëtarë kryesie të Qendrave të Lëvizjes VETËVENDOSJE! Ditëve të fundit po ankohen se ish-sekretari Organizativ, Dardan Molliqaj po organizon takime ilegale me aktivistet e Lëvizjes”, thuhet në komunikatën e nënshkruar nga Sekretari Organizativ, Ismajl Kurteshi.

“Në këto takime, sipas aktivistëve, ai po pretendon se ai, dhe përkrahësit e tij, do të bëjnë një “çarje të madhe” në organizatë, duke aluduar edhe për krijimin e një partie të re. Në këto takime, sipas aktivistëve, janë përmendur shifra që kanë të bëjnë me dëmet që ai synon t‘ia shkaktojë Lëvizjes Vetëvendosje”, vazhdon komunikata.

VV thotë se secili ka të drejtën e fjalës së lirë, por “kjo e drejtë dhe pozicionet që njerëzit mbajnë brenda Lëvizjes Vetëvendosje nuk mund të keqpërdoren duke përhapur dezinformata brenda Lëvizjes, me qëllim të dobësimit të saj”.

“Veprime e tilla të dëmshme janë të papranueshme dhe si të tilla duhen të ndalen menjëherë”, thotë komunikata.

“Në Lëvizjen Vetëvendosje angazhimi dhe puna e organeve vendimmarrëse dhe organizimi i aktiviteteve po vazhdojnë, në përputhje me Statutin dhe rregulloret e brendshme, si dhe po respektohet demokracia e brendshme dhe parimet tona politike. Përkrahja e madhe për Lëvizjen që po ndodh këto ditë është garancia më e mirë se asnjë manipulim nuk mund ta ndalë rritjen dhe fuqizimin e mëtutjeshëm të Lëvizjes Vetëvendosje, prandaj çfarëdo përpjekje për dobësimin e Lëvizjes Vetëvendosje është e kot”, thuhet në fund të komunikatës.