Policia amerikane ka zbuluar të dhëna të tjera nga aksidenti që ndodhi të premten e shkuar në Waterbury, ku humbi jetën një shqiptare. Sipas informacioneve, bëhet fjalë për 14-vjeçaren A. M., me origjinë shqiptare.
Raporti i policisë tregon se shqiptarja ishte një prej katër adoleshentëve që ndodheshin në një Hyundai Sonata të vjedhur, kur u përplas me një Ford Escape.
14-vjeçarja ka dalë jashtë mjetit si pasojë e përplasjes së fortë, ndërsa pavarësisht se u dërgua në spital, plagët ishin shumë të rënda dhe humbi jetën. Policia thotë se makina ku udhëtonin adoleshentët kaloi rrugën me të kuqe dhe në kryqëzim u përplas me Fordin.
Dy 15-vjeçarë të tjerë ndodhen në spital në gjendje të rëndë si pasojë e kësaj ngjarjeje. Një vajzë 15-vjeçare mori lëndime më të lehta dhe doli nga spitali të premten.
Shoferi i Fordit ka dalë po ashtu nga spitali. Të gjithë adoleshentët ishin nxënës të shkollës në Waterbury.
