Kompania ajrore hungareze me buxhet të ulët, “Wizz Air” ka vendosur ndërprerjen e linjës ajrore Shkup-Budapest. Nga 9 marsi i këtij viti më nuk do të fluturojë në këtë destinacion.
“Siç është praktikë e zakonshme, “Wizz Air” optimizon rrjetin e saj bazuar në rezultatet e këtyre kontrolleve. Me një përkushtim të fortë për ruajtjen e kapaciteteve në Maqedoninë e Veriut dhe Evropën Qendrore Lindore, “Wizz Air” vazhdon të përmirësojë shërbimet e saj dhe të eksplorojë mundësi të reja rritjeje në rajon. Të gjithë udhëtarët e prekur janë njoftuar për ndryshimet dhe janë ofruar opsione alternative të udhëtimit, si dhe opsione për rikthim të plotë në formën e pagesës origjinale ose kredisë për vizë”, theksuan nga kompania.
Nga Ministria e Transportit thonë se linja Shkup – Budapest asnjëherë nuk ishte mjet i mbështetjes financiare, gjegjësisht për atë linjë Ministria nuk ka paguar mjete si subvencionim.
“Politika e Ministrisë së Transportit është zhvillimi i komunikacionit ajror dhe në atë drejtim me konceptin e ri të cilin e promovojmë për vetëm gjashtë muaj arritëm të sigurojmë dhjetë linja të reja. Presim që përmes këtyre politikave në mënyrë shtesë ta zhvillojmë komunikacionin ajror, të sigurojmë shërbime cilësore dhe ta promovojmë Maqedoninë si destinacion atraktiv për turistët”, thonë nga Ministria..
Pas vendosjes së mënyrës së re për subvencionimin e linjave ajrore nga ana e Qeverisë, “Wizz Air” mori subvencione për fluturime nga Shkupi drejt Lionit, Barcelonës dhe Shtutgartit. Për këto destinacione fluturimet fillojnë nga 30 qershori, ndërsa “Wizz Air” tashmë shet bileta.
