Gazetari dhe analisti, Xhenis Sulimani, ka reaguar në lidhje me zhvillimet politike në prag të zgjedhjeve lokale në Kumanovë, duke theksuar nevojën për unitet politik shqiptar përtej interesave të ngushta partiake.
“Politika shqiptare në Kumanovë ka nevojë për unitet, përballë kandidimit të kryekomunarit aktual, që fatkeqësisht është favorit – duke e pasur parasysh mbështetjen e partnerëve të koalicionit, VLEN dhe VMRO-DPMNE”, shkruan Sulimani.
Ai shprehet i bindur se kësaj radhe nuk do të ketë asnjë shqiptar, pa dallim partie, që do të bëjë thirrje për votë për Maksim Dimitrievskin, duke e cilësuar këtë si një moment vendimtar për vetëdijen politike kolektive.
Sulimani e përmbyll reagimin me një mesazh simbolik dhe sfidues:
“Qarja? Një grusht #bashkë, ia #vlen kundër cilitdo tverdokorec!”
Ky qëndrim vjen në një kohë kur partitë politike janë në fazën e pozicionimit për zgjedhjet lokale që pritet të jenë vendimtare për orientimin politik të komunave me shumicë shqiptare. (INA)
