“Republika e Maqedonisë së Veriut duhet të zbatojë reformat e nevojshme dhe të përmbushë kushtet nëse dëshiron të fillojë negociatat për hyrje në Bashkimin Evropian”, theksoi nënkryetarja e partisë GERB, Ekaterina Zaharieva, e cila është nënkryetare e Komisionit për Politikë të Jashtme në parlamentin bullgar dhe ish-ministër i punëve të jashtme.
Shkak për komentin e saj, siç raporton BGNES, është votimi i paralajmëruar në parlamentin e RMV-së për përfshirjen e bullgarëve në Kushtetutën e Republikës së Maqedonisë së Veriut, që është një nga kërkesat kryesore të përcaktuara në të ashtuquajturin propozimi francez, që Shkupi duhet ta zbatojë para fillimit të negociatave të anëtarësimit me BE, përcjell INA.
Zaharieva u bëri thirrje, siç thotë ajo, “fqinjët dhe miqtë maqedonas të mos kenë frikë nga ndryshimet”.
“Ndryshimi i Kushtetutës së Republikës së Maqedonisë së Veriut nuk është punë e madhe. Bullgarët janë pjesë e realitetit në Republikën e Maqedonisë së Veriut dhe kjo duhet pranuar. Duhet të ndalet diskriminimi ndaj bullgarëve, si dhe rastet e shpeshta të dhunës fizike dhe verbale së fundmi. Dhe e gjithë kjo është e mirë për Republikën e Maqedonisë së Veriut dhe qytetarët e këtij vendi, që ata vetë të ndihen mirë në vendlindjen e tyre, e jo të emigrojnë”, thotë Ekaterina Zaharieva.
Ajo është e bindur se është e dobishme për të dy vendet që të hapin një faqe të re në marrëdhënie.
“Si Sofja ashtu edhe Shkupi humbasin nga marrëdhëniet e këqija. Është shumë më mirë të mos kemi kufij mes nesh dhe të zhvillohet biznesi. Është e rëndësishme që njerëzit lirisht të takohen dhe të komunikojnë pa frikë”, tha Zaharieva.(INA)
