Deputeti i Lëvizjes BESA, Fadil Zendeli në emisionin “10 Minuta” në TV21 ka folur edhe për skenën politike dhe zërat për formimin e Lëvizjes Vetëvendosje në Maqedoninë e Veriut.
Zendeli tha se krijimi i partive politike është diçka normale, por ai nuk beson se Lëvizja Vetëvendosje do të hapë seli edhe në Maqedoni.
“Krijimi i subjekteve politike në prag të zgjedhjeve dhe krijohen shumë subjekte të tilla. Nuk kam informacion se do të krijohet edhe këtu Lëvizja Vetëvendosje. Duke i njohur edhe përfaqësuesit e Lëvizjes Vetëvendosje në Kosovë, nuk besoj se do të vijë puna deri te krijimi i kësaj force politike edhe në Maqedoni. Thjesht ka pasur zëra të tilla. Opozitës shqiptare i duhet partnerit me Prishtinën dhe Tiranën dhe nuk ka asgjë të keqe në këtë kontest. Ne nuk na pengon nëse BDI-ja ka marrëdhënie të mira me Tiranën”, deklaroi deputeti Zendeli.
Zendeli: Vendi vakant në KSHZ i takon opozitës shqiptare
Deputeti i Lëvizjes Besa, Fadil Zendeli në intervistën në “10 minuta” në TV21 theksoi se vendi vakant në KSHZ i takon opozitës shqiptare dhe se kodi zgjedhor sipas tij, këtë e parasheh shumë qartë.
“Mendoj se është një situatë e qartë dhe nuk duhet të ketë dilema, për shkak se Kodi Zgjedhor e përcakton qartë, ku thotë se 4 vende i ka pozita dhe tre vende i ka opozita dhe një vend është vakant. Q nga koha kur Aleanca për Shqiptarët u bë pjesë e qeverisë, vendi ka ngelur vakant. Kryetari i Kuvendit duhet të marrë iniciativë për procedurë parlamentare që ky vend të plotësohet. Kryetari i Kuvendit ka bërë obstruksion për ta shtyrë këtë vendim. Pretendimet e Aleancës janë të pabaza, sepse nuk mund ta mbajnë peng këtë vend vakant”, deklaroi Zendeli.(INA)
