Sipas njoftimit të Komisionit Shtetëror të Zgjedhjeve (KShZ), në disa komuna nuk është arritur pjesëmarrja e nevojshme prej të paktën një të tretës (33,33%) të votuesve të regjistruar, që është kusht për vlefshmërinë e zgjedhjeve sipas Kodit Zgjedhor.
Të dhënat tregojnë se pjesëmarrja ka qenë:
në Gostivar – 33,31%,
në Vrapçisht – 25,18%,
në Mavrovë dhe Rostushë – 30,31%,
në Qendër Zhupë – 21,49%.
Meqë asnjë nga këto komuna nuk e ka arritur pragun ligjor të pjesëmarrjes, procesi zgjedhor do të përsëritet plotësisht.
Sipas nenit 132, paragrafi 2 i Kodit Zgjedhor, nëse në raundin e parë nuk dalin në votime të paktën një e treta e votuesve të regjistruar, zgjedhjet duhet të përsëriten. Po ashtu, neni 132-a parashikon që zgjedhjet e përsëritura të mbahen brenda 60 ditëve pas shpalljes së rezultateve përfundimtare, ndërsa në raundin e përsëritur nuk vlen më kushti për pjesëmarrje minimale.
Kjo do të thotë se raundi i parë në këto katër komuna do të zhvillohet sërish gjatë dy muajve të ardhshëm, ndërsa më pas, nëse është e nevojshme, do të mbahet edhe raundi i dytë.
Ndërkohë, raundi i dytë i Zgjedhjeve Lokale 2025 do të mbahet të dielën, kur qytetarët do të votojnë për kryetarë komunash në 32 komuna dhe në Qytetin e Shkupit, ndërsa në 44 komuna zgjedhjet për kryetar janë përmbyllur që në raundin e parë.(INA)
