Ziadin Sela reagon ashpër ndaj VLEN-it pas vendimit të Kushtetueses për mërgatën: “I pafytyrë, i paturp, i pakurriz…”
Kryetari i Aleancës për Shqiptarët, Ziadin Sela, ka reaguar ashpër ndaj Frontit opozitar VLEN, pas vendimit të Gjykatës Kushtetuese që rrëzoi kategorizimin e qytetarëve në “rezidentë” dhe “jo-rezidentë”, duke e konsideruar të padrejtë përjashtimin e mërgatës nga përfaqësimi dhe llogaritjet zyrtare.
Sela ka akuzuar përfaqësuesit e VLEN-it se, sapo kanë marrë poste në Qeveri, kanë ndërmarrë një sërë veprimesh që shkojnë në dëm të interesave të shqiptarëve në përgjithësi dhe të mërgatës në veçanti:
“Të marrish një post qeveritar, e menjëherë më pas:
– Të parin vendim që sjell është ulja e përqindjes së përfaqësimit të shqiptarëve nga 29% në 24%, duke hequr popullatën jorezidente nga përllogaritja…
– Të heqësh nga ndarja e kreditit hungarez popullatën jorezidente shqiptare edhe pse janë taksapagues dhe të barabartë në kthimin e këtij krediti…
– Akoma të kesh në procedurë parlamentare propozim-ligj për pushtetin lokal, ku synohet të ulen numrat e këshilltarëve nëpër këshillat komunale, bazuar në po të njëjtën logjikë të heqjes së popullatës jorezidente nga përllogaritja…
– Ta votosh në të gjitha fazat ligjin vetëm sepse kështu ka urdhëruar padroni, në ndërkohë që vetëm opozita shqiptare e ka bllokuar për shkak të Badinterit…
– Të vraposh sot të marrësh merita kur, pikërisht me iniciativë të opozitës shqiptare, kategorizimi në rezident dhe jorezident u rrëzua nga Kushtetuesja – dhe ta fajësosh përsëri opozitën – duhet të jesh me shumë PA!”
Në fund, Sela e përmbyll reagimin e tij me një ton të ashpër e ironik:
“I pafytyrë, i paturp, i pakurriz e me radhë e teposhtë i PA…
P.S. Ore ç’rracë politikanësh janë këta!?”
Ky reagim pason vendimin e fundit të Gjykatës Kushtetuese që e konsideroi të papranueshëm përjashtimin e popullatës jorezidente nga llogaritjet zyrtare.(INA)
