Urim Saliu
A ka ndonjë mundësi t’i ulni pak premtimet? Tetovën e shndërruat në Dubai, Gostivarin në Nju Jork, Strugën në Paris, ndërsa Çairin në Kopenhagen. Dal e shëtis në qytetin tim dhe nuk e njoh më – rrugët, sheshet, trotuaret. Të gjitha janë transformuar nga premtimet tuaja.
Ju keni ndërtuar një realitet paralel, ku çdo qytet shqiptar duket si metropol botëror, ku çdo rrugë është autostradë, çdo lagje është si Manhattan dhe çdo park është si Central Park. Premtimet tuaja i kanë kthyer qytetet tona në vende futuriste, ku unë, qytetari i thjeshtë, ndjehem sikur kam udhëtuar në një planet tjetër.
Në këtë “civilizim të ri” nuk di si të sillem më. Nuk e di a duhet të ec me biçikletë elektrike, a të përdor skuter fluturues apo të pres metronë që, sipas premtimeve, duhet të kalojë nën Tetovë.
