Shefi i Shtabit zgjedhor të VLEN, Adnan Azizi në hapjen e Shtabit sonte në Vrapçisht tha se si pushtet qendror janë të mobilizuar për të qeverisur me zero korrupsion. Dhe, kur pushteti qendror bashkohet me komunat që nuk do të ketë korrupsion, tha ai e dini se do të ketë zhvillim në infrastrukturë, investime kapitale, zhvillim ekonomik, realizim të projekteve e kështu me radhë.
“Ata të tjerët e dini se keqpërdorën jo vetëm pushtetin qendror dhe atë lokal, por edhe komunat i përdorën për të pasuruar vetveten dhe jo për të mbrojtur interesat publike”, tha ai.
Ne do ta bëjmë të kundërtën, kryetari do të jetë në shërbim të banorëve të Vrapçishtit, tha tutje Azizi.
Sa i takon korrupsionit Azizi tha se e kanë shporrur nga institucionet dhe se këtë do ta bëjnë edhe pas 19 tetorit kur do të fitojnë komunat.
“E tha 1 vit më parë edhe ambasadorja amerikane Ageler se korrupsioni në Maqedoni para se të vijmë ne në pushtet i përngjan epidemisë, është në çdo pore të jetës dhe në çdo institucion, por ne e shporrëm nga institucionet dhe tani më 19 tetor do ta shporrim edhe nga komunat dhe pushteti lokal”, tha ai.
Për fund ai shtoi: “BDI nuk kthehet më në pushtet është e etiketuar si parti e korrupsionit, listave të zeza dhe parti non grata”.
