Në sallën e gjyqit në Idrizovë sot ka nisur procesi gjyqësor për tragjedinë në Koçan, ku humbën jetën 63 persona. Përveç të akuzuarve dhe avokatëve, në sallë janë të pranishëm edhe familjarët e viktimave, gazetarë vendorë dhe të huaj, përfaqësues të OSBE-së dhe disa ambasadave.
Prindërit e fëmijëve të ndjerë shprehin frikën se edhe ky rast mund të përfundojë si “Laskarci”, “Besa Trans” dhe “Spitali Modular”, pra pa drejtësi të plotë.
Në fillim të seancës së parë, babai i të ndjerit Andrej Stojanov deklaroi se kanë frikë se do të manipulohen.
“Në fillim të seancës gjyqësore përballemi me një skepticizëm të madh dhe me një skemë të përgatitur nga përfaqësues të avokatëve dhe të akuzuarve, të cilët në mënyra të ndryshme e manipulojnë dhimbjen tonë që të na e thellojnë edhe më shumë. Ne trajtohemi si figura, dhe meqë fëmijët tanë nuk jetojnë më, njësoj duan të zhdukim edhe ne, që të mos ketë kush të shkojë te varret e tyre. Më çudit me çfarë ndërgjegjeje dhe me çfarë fytyre avokatët e të akuzuarve marrin para të përgjakura dhe me çfarë krenarie japin deklarata se ky gjyq do të zgjasë 15–20 vjet. Për ne edhe 15 ditë janë shumë, e jo më 15 muaj. Tashmë kanë kaluar tetë muaj. Ne, prindërit, ndjehemi të manipuluar dhe frikësohemi se rasti ynë do të përfundojë si gjyqi për Laskarcin, si tragjedia me autobusin në Bullgari apo si rasti i spitalit modular.
Kur kemi pasur takime me kryeministrin – dy herë – dhe me ministrin e Brendshëm po ashtu dy herë, na u tha se rasti i Koçanit është kulmi i të gjitha krimeve dhe ngjarjeve të rënda. Dhe patjetër duhet të bëhet një prerje, sepse nëse nuk bëhet, nuk ka arsye të ekzistojmë si shtet. Sipas nesh, ky është një nga testet më të rëndësishme për shtetin. Ndërsa koha kalon, kemi përshtypjen se po na harrojnë,” theksoi babai i Andrej Stojanovit të ndjerë.
