Presidenti i Shteteve të Bashkuara, Donald Trump, tha se do të takohet të premten në Shtëpinë e Bardhë me kryetarin e sapozgjedhur të Nju Jorkut, Zohran Mamdani — në atë që do të jetë takimi i parë mes presidentit republikan dhe socialistit demokrat që fitoi zgjedhjet e këtij muaji në Nju Jork.
Mamdani dhe Trump janë kritikuar shpesh ndaj njëri-tjetrit, ndërsa Trump në zgjedhje kishte mbështetur kundërshtarin e Mamdanit, Andrew Cuomo.
Nga ana e tij, Mamdani ka kritikuar politikat e administratës Trump, përfshirë goditjen ndaj emigracionit dhe mbështetjen e SHBA-së për Izraelin gjatë luftës në Gaza.
“Jemi dakorduar që ky takim të zhvillohet në Zyrën Ovale të premten, më 21 nëntor”, tha Trump në një postim në rrjetet sociale të mërkurën.
Mamdani u tha gazetarëve më herët këtë javë se ekipi i tij kishte kontaktuar Shtëpinë e Bardhë për të organizuar takimin. Një zëdhënës i tij deklaroi të mërkurën se kryetari i sapozgjedhur synon të diskutojë në Uashington mbi “sigurinë publike, sigurinë ekonomike dhe agjendën e përballueshmërisë”.
Gjatë fushatës zgjedhore, Trump kishte kërcënuar se do t’i ndalte miliarda dollarë fonde federale qytetit nëse Mamdani fitonte. Qeveria federale i siguron Nju Jorkut 7.4 miliardë dollarë në vitin fiskal 2026, ose rreth 6.4% të totalit të shpenzimeve të qytetit, sipas një raporti të Kontrollorit të Shtetit të Nju Jorkut.
Që prej ngritjes së Mamdanit në skenë, Trump e ka cilësuar atë si “komunist”.
Një nga shtyllat kryesore të fushatës fituese të Mamdanit ishte pikërisht kundërshtimi i veprimeve të presidentit 79-vjeçar në qytet, veçanërisht në lidhje me emigracionin.
Zohran Mamdani do të bëjë betimin si kryetar bashkie më 1 janar.
