Gjeneratat e reja të Akademisë së Futbollit të KF “Bashkimi” nga Kumanova shënuan fitore të rëndësishme ndaj KF New Star në kuadër të Superligës së moshave të reja.
Gjenerata 2010 arriti fitore me rezultat 3:2, ndërsa gjenerata 2009 triumfoi me rezultat 2:1, duke treguar se puna e palodhshme e akademisë po jep frytet e saj.
Koordinatori i Akademisë së KF “Bashkimi”, Erkan Osmani, pas ndeshjes u shpreh se këto rezultate janë dëshmi se dalëngadalë gjeneratat e reja po rikthehen aty ku e kanë vendin. Ai vlerësoi punën e trajnerëve Ariat Osmani me gjeneratat 2009 dhe 2010, si dhe Durim Hydës me gjeneratat 2007 dhe 2008.
“Fitoret janë të rëndësishme, por më e rëndësishmja është se po rikthehemi aty ku e kemi vendin dhe se po rritet cilësia e futbollistëve të rinj, të cilët janë e ardhmja e klubit,” theksoi Osmani.
KF “Bashkimi”, i njohur për traditën dhe kontributin në futbollin në Maqedoninë e Veriut që tani u rikthye fuqishëm në Ligën e Parë, po synon që përmes këtyre gjeneratave të forcojë bazën e tij sportive dhe të ndërtojë ekip të qëndrueshëm për të ardhmen.(INA)
