Përfaqësuesja e Maqedonisë pësoi një humbje të thellë në Kardif, me rezultat 7-1 ndaj Uellsit, duke e mbyllur në vendin e tretë grupin kualifikues. Edhe pse i mjaftonte vetëm barazimi në Kardif, megjithatë uellsianët e “zjarrtë” në fund ia shkaktuan një nga humbjet më të rënda në historinë e Maqedonisë.
Uellsi në minutën e 18-të kaloi në epërsi nga penalltia me anë të Vilsonit, ndërsa tre minuta më vonë Bruks u përkujdes për 2-0. Megjithatë, Miovski reagoi menjëherë dhe ngushtoi rezultatin, duke e lënë Maqedoninë ende në lojë për të shmangur humbjen. Por, deri në fund të pjesës së parë, një gol i bukur i Xhonsonit vendosi rezultatin 3-1.
Në pjesën e dytë, uellsianët shtuan edhe më shumë ritmin dhe shënuan edhe katër gola të tjerë. Xhejms në minutën e 57-të pas një aksioni të shkëlqyer realizoi për 4-1, më pas Vilson nga goditja e dënimit shënoi për 5-1, kurse i njëjti lojtar realizoi edhe të gjashtin gol nga penalltia, duke kompletuar “hat-trick”-un.
Rezultatin përfundimtar 7-1 e vendosi Brodhad pas një goditjeje nga këndi dhe pakujdesisë në mbrojtje.
Pavarësisht debaklit, Maqedonia do ta presë shortin e play-off-it për Botërorin nga xhiroja e katërt, falë rezultateve në Ligën e Kombeve.
