Analisti politik, Ilir Deda, e ka komentuar arrestimin e Fatmir Shehollit, duke thënë se ky është rasti më i fortë që arrestohet një emër që është ditur që ka punuar për sigurimin shtetëror serb.
Deda tha se akuza për spiunazh duhet të dëshmohet në mënyrë shumë të saktë sipas Kodit Penal, por u shpreh se duket që Fatmir Sheholli i është kthyer bashkëpunimit me BIA-n serbe.
“Duket që akuza për spiunazh duhet të dëshmohet në mënyrë shumë të saktë sipas Kodit Penal dhe duket që Fatmiri është kthyer në bashkëpunim me BIA-n dhe ka të bëjë me rrjedhjen përnjëherë të videove që kanë të bëjnë me luftën kundër Nenad Rashiqit dhe njerëzve të tjerë që s’janë në një linjë me Listën Serbe në prag të zgjedhjeve lokale”.
“Por, duket sipas disa informacioneve ai i është kthyer bashkëpunimit me BIA-n. Për Prokurorinë Speciale duhet të jetë veprimtari aktive. Besoj që ata kanë prova dhe do t’i marrin vesh të gjithë”, tha Deda në Klan Kosova.
Tutje, ai u shpreh se politika kosovare e ka rehabilituar emrin e Shehollit e tha se nuk e di pse, por sipas tij, do të merret vesh në vazhdim pse politika e ka rehabilituar Shehollin “si shumë të tjerë që i dimë e shumë të tjerë që nuk i dimë”.
