Shkruan: Naser Pajaziti
Edi Rama gjeti fajtorët për ndotjen e bregdetit shqiptar siç e tha “shqipot” e Shqipërisë, Kosovës e Maqedonisë.
Po pse kjo gjuhë denigruese ndaj shqiptarëve të vet?
Apo është më e lehtë të stigmatizosh bashkëkombësit sesa të pranosh dështimin e shtetit në menaxhimin e mbeturinave dhe shërbimeve publike?
A mos vallë turistët serbë, rumunë apo të tjerë qenkan më “të pastër” se shqiptarët? Apo aty nuk guxon të flasësh?
Kjo qasje përçmuese është e rrezikshme: ndan kombin në “mysafirë të padëshiruar” dhe e zhvendos fajin nga pushteti tek qytetari.
Ndotja nuk është faj i shqiptarëve që sjellin jetë dhe ekonomi në bregdet, por i institucioneve që kanë dështuar t’i menaxhojnë plazhet dhe mbeturinat!
Edi Rama e di se bregdeti shqiptar po shndërrohet në një rrëmujë të pakontrolluar – pa plane urbanistike, me ndërtim të mbingarkuar, pa rrjet kanalizimesh dhe shpesh pa ujë. Në zonën e Golemit, koshat e mbeturinave qëndrojnë vetëm dy metra larg hoteleve, duke e shndërruar pamjen në të papranueshme dhe duke kundërmuar në erë qoftinash.
Pallatet përreth bregdetit muaj më parë kaluan dhjetë ditë pa ujë, ndërsa pushuesit përjetojnë çdo ditë pasojat e keqmenaxhimit. Një pushues që ka apartament aty më tregoi vetë situatën dhe frustrimin që ndjejnë banorët dhe turistët: “Kjo nuk është turizëm, është dështim total i shtetit dhe institucioneve!” Edi Rama nuk të kanë faj “shqipot”, por qeverisja pa strategji zgjidhjeje dhe menaxhimi!
