Aksionarët e Teslës mund t’i japin së shpejti CEO-s Elon Musk, aktualisht personi më i pasur në botë, mundësinë për të u bërë trilioneri i parë në historinë moderne – ose rrezikojnë që ai të largohet nga kompania.
Paketa e re e kompensimit të Musk do të jetë pika kryesore e votimit në mbledhjen vjetore të Teslës që mbahet të enjten. Aksionarët e kanë miratuar më herët me shumicë të madhe pagat e tij, por këtë vit situata është më e ndjeshme: Tesla paralajmëroi se Musk ka lënë të kuptohet se mund të “ndjekë projekte të tjera” nëse propozimi refuzohet.
Paketa përfshin një grant aksionesh që mund t’i sigurojë Musk deri në 423.7 milionë aksione shtesë të Teslës përgjatë 10 viteve të ardhshme. Këto aksione do të mund të arrijnë vlerën e 1 trilion dollarëve, përderisa kompania arrin kapitalizim tregu prej 8.5 trilion dollarësh. Përveç kësaj, Tesla duhet të përmbushë edhe disa objektiva financiarë dhe operacionalë që Musk të fitojë plotësisht të drejtën mbi këto aksione.
Arritja e kapitalizimit prej 8.5 trilion dollarësh kërkon një rritje prej rreth 466% të çmimit aktual të aksioneve – një vlerë rreth 70% më e lartë se kapitalizimi rekord i Nvidia-s që javën e kaluar kaloi 5 trilionë dollarë.
Megjithatë, Tesla është përballur me rezultate të dobëta gjatë këtij viti: shitjet dhe fitimet ranë, ndërsa kompania përballon sfida të mëdha financiare pasi SHBA uli mbështetjen për blerjen e automjeteve elektrike.
Musk dhe drejtuesit e kompanisë insistojnë se Tesla po kalon në një fazë të re strategjike – nga shitja e thjeshtë e veturave elektrike tek zhvillimi dhe shitja e teknologjive të makinave vetë-drejtuese, robotëve humanoidë dhe një flote potenciale “robotaxi”. Por këto projekte janë ende në zhvillim dhe nuk kanë dalë ende në treg.
Edhe nëse paketa miratohet, nuk është e sigurt se Musk do t’i realizojë fitimet e plota, pasi më parë duhet të përmbushen objektivat e rritjes dhe të bëhet funksionale teknologjia e premtuar.
Megjithatë, shumë investitorë dhe analistë të Wall Street besojnë se Tesla është në rrugën drejt këtij transformimi dhe se Musk është faktori kyç në të ardhmen e kompanisë.
“Aksionarët do ta mbështesin këtë masivisht, sepse Musk është aseti më i madh i Teslës,” thotë Dan Ives, analist në Wedbush Securities. “Ai është personi që e udhëheq Teslën drejt autonomisë dhe robotikës.”
Në votimin e fundit për pagën e tij, 84% e aksionarëve votuan pro.
