Në Fakultetin e Administrimit të Biznesit në Kumanovë sot u zhvillua ceremonia solemne e hapjes së vitit të ri akademik për studentët e rinj.
Në këtë ngjarje morën pjesë Prorektori për Bashkëpunim Ndërkombëtar i Universitetit të Tetovës, prof. dr. Salajdin Salihi, stafi akademik dhe administrativ i fakultetit, si dhe një numër i madh studentësh të rinj.
Dekani i Fakultetit, prof. dr. Llokman Hebibi, në fjalën e tij përshëndetëse uroi mirëseardhje studentëve të vitit të parë dhe theksoi rëndësinë e këtij momenti për të ardhmen e tyre akademike dhe profesionale.
“Është kënaqësi e veçantë dhe privilegj për mua që në emër të mësimdhënësve dhe në emrin tim personal t’ju uroj mirëseardhje, fillim të mbarë të studimeve dhe suksese të shumta. Ky tempull diturie do të ndikojë në ngritjen tuaj profesionale dhe avancimin në karrierat tuaja të ardhshme”, u shpreh dekani Hebibi.
Me një fjalë rasti iu drejtua studentëve edhe prof. dr. Nehat Ramadani, i cili uroi mirëseardhje dhe suksese në rrugëtimin e tyre të ri akademik.
Ndërkaq, edhe Prorektori për Bashkëpunim Ndërkombëtar, prof. dr. Salajdin Salihi, uroi studentët për zgjedhjen e tyre dhe u dëshiroi sukses gjatë studimeve.
Ceremonia u përmbyll me shpërndarjen tradicionale të indeksave për studentët e vitit të parë.(INA)
