James Rubin, ish Ndihmës i Sekretarit amerikan të Shtetit po vazhdon dëshminë e tij në Gjykatën Speciale, në rastin e Hashim Thaçit dhe krerëve të tjerë të Ushtrisë Çlirimtare të Kosovës të cilët po gjykohen për krime lufte dhe krime kundër njerëzimit.
Me nisjen e vazhdimit të dëshmisë sot, ai u sfidua nga gjykatësit. Iu shfaqën deklarata të pjesëmarrësve në Rambuje në vitin 1999 dhe të Sekretares së atëhershme të Shtetit, Medeleine Albright.
Në një nga deklaratat, Albright u dëgjua t’i referohej Thaçit si lider, ndërsa njëri nga gjykatësit e pyeti Rubinin për këtë, duke u interesuar për strukturën komanduese të UÇK-së.
“Ajo tha ‘lider, padyshim lider’… Nuk i drejtohet Adem Demaçi, as nuk thotë se ishte një lloj ministri i jashtëm”, tha gjykatësi.
“Ajo tha njëri prej liderëve, dhe këtu ka një dallim të madh”, ishte një pjesë e përgjigjes së Rubin.
Diplomati amerikan me përvojë tha se SHBA-ja donte që Thaçi “të kthehej në një udhëheqës, udhëheqës i një kombi”.
Lidhur me pyetje të tjera për rolin e Thaçit, Rubin tha se ka pasur autoritet nga Albright dhe se nëse do të kishte diçka tjetër, ai do ta kishte ditur.
