Bilal Kasami, një nga liderët e VLEN-it dhe kandidat për një mandat të ri si kryetar i komunës së Tetovës, thotë se deklarata e tij për mbështetje të kandidatit të AKI-t në Kërçovë, Fatmir Dehari, është keqinterpretuar sepse, siç thekson, kundërshtarët e VLEN-it u përpoqën të hapnin hartën etnike në këto zgjedhje. Ai nuk e sheh reagimin e kryeministrit dhe liderit të VMRO-DPMNE-së Hristijan Mickoski si një “vërejtje”, duke shpjeguar se deklarata e tij për Kërçovën është nxjerrë nga konteksti.
Sipas tij, duhet të merret në konsideratë konteksti dhe mediumi në të cilin është bërë deklarata, si dhe rrethanat në të cilat është transmetuar më pas. Me këtë, thekson, ajo është larguar plotësisht nga ideja e saj origjinale.
“Deklarata, në momentin që u bë, ishte në kontekstin e asaj që kundërshtarët tanë politikë në këto zgjedhje përpiqeshin maksimalisht të hapnin hartën etnike. E gjithë ajo deklaratë, do të thoja, ishte e sinqertë, por u keqinterpretua politikisht – theksoi Kasami.
Në intervistën e tij në Alsat, theksoi se qëndrimet e tij janë të qarta dhe në përputhje me ato të koalicionit VLEN, duke shpjeguar se qëllimi nuk ishte të mbështetej asnjë kandidat bazuar në përkatësi etnike, por përkundrazi në bazë të vlerave morale dhe performancës politike.
“Fatmir Dehari është kandidati më i dobët i BDI-së, i cili gjatë qeverisjes së tij nuk i solli asgjë të mirë Kërçovës. Përkundrazi, ai i bëri dëm qytetit dhe popullit të Kërçovës. Për këtë arsye, ne nuk mund të qëndrojmë pas tij vetëm pse është shqiptar”, tha Kasami.
Kryetari i komunës së Tetovës shton se Lëvizja Besa gjithmonë ka mbështetur kandidatët që përfaqësojnë interesat e qytetarëve, pavarësisht nga përkatësia etnike.
“Si kryetar i komunës së Tetovës, punova për të gjithë qytetarët, shqiptarë, maqedonas, turq, romë. Tetova është një qytet kozmopolit dhe të gjithë gëzojnë të gjitha përfitimet e këtyre katër viteve. Në këtë frymë, edhe në Kërçovë, do të donim që BDI të zgjidhte një kandidat tjetër, më të denjë”, thekson Kasami.
Ai kujton se Lëvizja Besa kishte kandidatin e vet në Kërçovë dhe se qytetarët tani e dinë “kë duhet të mbështesin në raundin e dytë”.
Kasami iu referua edhe komenteve të kryeministrit Hristijan Mickoski në lidhje me deklaratën e tij për mbështetje të kandidatit të AKI-t në Kërçovë, Dehari.
Në intervistë, ai thekson se nuk e sheh reagimin e Mickoskit si një “vërejtje”, duke shpjeguar se deklarata e tij është nxjerrë nga konteksti.
“Fillimisht, nuk mendoj se ka pasur ndonjë vërejtje. Duhet të marrim në konsideratë kontekstin, vendin dhe mediumin në të cilin u bë deklarata. Kjo u keqinterpretua politikisht”, tha Kasami.
Ai dhe Vlen, siç theksoi, nuk e mbështesin deklaratën e kandidatit për kryetar të Komunës së Bërvenicës, Hakim Ramadani, i cili është edhe drejtor i Inspektoratit Shtetëror për Vetëqeverisje Lokale, i cili, në një takim me mërgimtarët në Hamburg të Gjermanisë, ka thënë se “duhet ta dihet se kush është shefi i vendit të vet”.
“Duhet të bashkohemi rreth vizioneve të përbashkëta për zhvillim. Qëndrimet e kandidatit për Komunën e Bërvenicës janë qëndrimet e tij personale, unë, si kryetar i Tetovës, përfaqësoj të gjithë qytetarët, maqedonasit, romët, turqit dhe sigurisht shumicën e shqiptarëve”, theksoi kryetari Kasami.
