Një delegacion shtetëror nga Kosova ndodhet aktualisht në Shtetet e Bashkuara të Amerikës në kuadër të Javës së Nivelit të Lartë të Sesionit të 80-të të Asamblesë së Përgjithshme të Kombeve të Bashkuara, një ndër ngjarjet më të rëndësishme në arenën ndërkombëtare diplomatike.
Pjesëmarrjen e saj në këtë forum e njoftoi fillimisht Presidentja e Republikës së Kosovës, Vjosa Osmani, e cila ndodhet në vizitë zyrtare në Washington.
Ndërkohë, është konfirmuar gjithashtu se në këtë ngjarje javore do të jetë i pranishëm edhe kryeministri në detyrë, Albin Kurti, ku pjesëmarrja e tij në këtë forum vjen në një moment kyç për skenën politike të brendshme, pasi Kosova ndodhet në prag të zgjedhjeve lokale.
Kjo vizitë madje mund të shihet si mundësi e Kurtit për imazhin e tij, pas vendimit të fundit të ShBA-së për pezullimin e Dialogut Strategjik, pikërisht shkaku i deklaratave të tij.
Megjithatë kujtojmë se me udhëtimin e presidentes jashtë vendit, përgjegjësitë kushtetuese që lidhen me ushtrimin e funksioneve të saj, përfshirë nënshkrimin e dekreteve dhe përfaqësimin e shtetit brenda territorit të Kosovës, kalojnë përkohësisht te Kryetari i Kuvendit.
Ky rregullim është i përcaktuar qartë në nenin 90 të Kushtetutës së Republikës së Kosovës, i cili parasheh që, gjatë mungesës së presidentit, funksionet presidenciale të ushtrohen nga Kryetari i Kuvendit të Kosovës.
Aktualisht, këtë përgjegjësi e mban Dimal Basha, i cili ndodhet në Kosovë, ku duhet të sigurojë vazhdimësinë institucionale në mungesë të përkohshme të krerëve të tjerë shtetërorë.
Mbi emërimin e Dimal Bashës kryeparlamentar, ritheksojmë se pati mjaftueshëm kritika dhe sulme ndërpartiake, meqë i njëjti në një punim shkencor, kishte fyer luftën e Ushtrisë Çlirimtare të Kosovës.
