Disa shërbime të Google, përfshirë edhe YouTube, ishin të padisponueshme në Turqi dhe në disa pjesë të Evropës që nga mëngjesi i së enjtes (4 shtator), deklaruan zëvendësministri i Telekomunikacionit të Turqisë dhe mbikëqyrësi lokal i internetit, transmeton Reuters.
Shoqata për Lirinë e Shprehjes, e cila ndjek censurën lokale në internet, njoftoi se Google nuk funksionon që rreth orës 9:00 në Turqi.
“Organizmi lokal për siguri kibernetike ka kërkuar një raport teknik nga kompania Google”, shkroi në platformën X zëvendësministri Ömer Fatih Sayan.
Harta e publikuar nga Sayan tregon se Google ka pasur probleme në Turqi, në pjesë të mëdha të Evropës Juglindore dhe në disa vende në Ukrainë, Rusi dhe Evropën Perëndimore.
Vështirësi u vunë re edhe në faqen Downdetector, ku u shënua një rritje e madhe e numrit të raportimeve.
