Qyteti i Shkupit ka publikuar programin për shënimin e natës së ndrrimit të motive, që do të jetë një festë në sheshin qendror “Maqedonia” në Shkup.
Sipas njoftimit, grupet që do të argëtojnë qytetarët janë: rok grupi “Area”, “Nokaut” dhe këngëtarja maqedonase me emrin artistik Sarah Mace&The Girlzz. Festa do të nis nga ora 19.30, përcjell INA.
Por ajo që bën përshtypje se nuk është zgjedhur asnjë këngëtar shqiptar, edhe pse si zakonisht edhe shumë qytetarë shqiptarë praktikojnë që ndërrimin e moteve ta presin në sheshin e Shkupit. E njejta gjë kishte ndodhur edhe vitin e kaluar.
Nga Qyteti i Shkupit nuk ka sqarime të tjera se përse po ndodhë kjo. Nga ana tjetër, siç dihet pjesë e koalicionit është BDI, e cila ka pjesë të pushtetit të saj në disa drejtori. Deputeti aktual i BDI-së dhe ish-kryetari i Sarajit, Blerim Bexheti ishte ai që kishte arritur marrëveshjen për bashkëqeverisje me kryetaren e Qytetit të Shkupit, Danella Arsovska. Pritet që edhe BDI të sqarojë se përse në këtë festë nuk është askush nga estrada shqiptare, kur dihet se taksapaguesit janë edhe qytetarët shqiptarë. (INA)
