Kryetarja e listës për këshilltarë të koalicionit VLEN në Komunën e Kërçovës, Teuta Ahmedi Purellku, ka reaguar ndaj deklaratave të kryetarit në ikje, i cili publikisht pranoi se për 20 vite pushtet nuk është arritur ndërtimi i spitalit të Kërçovës.
Sipas saj, përmes “zërit të doktorit”, kryetari ka sharë partinë e tij, duke pranuar paaftësinë e menaxhimit. Purellku theksoi se vetëm një kandidat si Fatmir Limani, me vullnet të palëkundur dhe pjesë e qeverisë që ndau 47.5 milionë euro mjete buxhetore për ndërtimin e spitalit, mund ta bëjë realitet këtë projekt jetik për qytetarët.
“Pse garon për mandat të ri kur vetë pranon se nuk ke forcë, as mundësi, as vizion për ta bërë atë që Kërçova ka më së shumti nevojë? Tentativë e dëshpëruar për t’u amnistuar nga dështimet. Qytetarët nuk harrojnë: 20 vite pritje, 20 vite mashtrime, 20 vite bosh. Ky është autogoli politik i shekullit!”, u shpreh Purellku.
Ajo shtoi se ka ardhur koha për ndryshim të vërtetë në Kërçovë.
