“Unë po fle i qetë, kështu që edhe qytetarët munden të flenë të qetë”, tha ministri i Punëve të Brendshme, Pançe Toshkovski
Kështu u përgjigj ministri i brendshëm Pançe Toshkovski në Daily Click në TV21 i pyetur nëse qytetarët munden të flenë qetë pas paralajmërimeve për desatbilizim të shtetit. Tha se për momentin gjendja sigurie është e qëndrueshme edhe pse ka pasur indice për prishjen e së njëjtës. Insistuam të na përgjigjet se kush dhe si po përpiqet ta destabilizojë vendin, po përgjigje konkrete nuk morëm.
-G: Si thoni në terminologjinë juridike, indice…A ka indice për prishjen e sigurisë së shtetit?
-Toshkovski: Shumë herë kam folur për këtë brenda muajit të fundit dhe të gjitha ato që i kam thënë u tregua se është fakt real, në aspekt se ka përpjekje për nxitje të tensioneve ndëretnike, të gjithë ne jemi dëshmitarë se kjo është ashtu, por gjithashtu jemi dëshmitarë se MPB dhe të gjitha institucionet e tjera me kompetenca në sektorin e sigurisë, reagojnë dhe do të reagojnë në të ardhmen.
Por çfarë ndodhi me grupet e armatosura për të cilat foli Hristijan Mickoski në fushatën parazgjedhore të cilat gjoja janë mbledhur në Çair dhe veprojnë nën udhëheqjes së njerëzve të afërm të Ali Ahmetit. A kishte grupe të tilla?
-Kishte indice të tilla në të kaluarën.
G: A ishte grupe të armatosura në Çair?
T: Kishte indice të tilla në periudhën e kaluar, kishte informacione të tilla dhe në të ardhmen për çdo gjë për të cilën do të ketë prova adekuate, MPB do të veprojë në mënyrë adekuate.
G: Domethënë për këtë nuk ka pasur prova të mjaftueshme për të vepruar?
T: Përgjigjja ime nuk ishte kjo. Përgjigjja ime është se për çdo gjë për të cilën do të ketë prova të mjaftueshme, prova që do të mjaftojnë për ngritje të akuzës, e njëjta do të procedohet.
G: A është proceduar diçka nga kjo?
T; Për momentin nuk mund të përgjigjem.
Sa i përket luftës kundër krimit dhe korrupsionit të lartë, Toshkovski paralajmëroi se ka hetime për ministra të caktuar që ishin në funksion në të kaluarën për keqpërdorim të mundshëm të detyrës zyrtare. Por duke pasur parasysh se gjithçka është në fazë parahetimore, nuk mund të japë më shumë detaje.
