Kryeministri i Kosovës, Albin Kurti, në një postim, ka përshëndetur suksesin e dy miqve të tij, Izeti dhe Bilalli, të cilët triumfuan përmes projekteve konkrete dhe punës së ndershme. I pari fitoi që në raundin e parë, ndërsa i dyti dy javë më vonë, të dy me diferencë të thellë.
“Suksesi në zgjedhjet lokale është konfirmim i qeverisjes së mirë të VLEN-it, i vullnetit për ndryshim te shqiptarët dhe një shans i madh për reforma në Maqedoninë e Veriut,” shkruan Kurti.
Ai vuri në pah se 15 muajt e parë të VLEN-it në pushtet janë karakterizuar nga qeverisja me duar të pastra, pa korrupsion dhe skandale, duke krijuar një dallim etik me qeverisjet e kaluara.
Kryeministri theksoi gjithashtu se kjo frymë e ndryshimit ka mundësuar një bashkëpunim të hapur dhe multidimensional mes Kosovës dhe Maqedonisë së Veriut, nga takimet përmbajtësore të dy qeverive e deri te menaxhimi i përbashkët i kufirit.
“Kosova dhe Maqedonia e Veriut, si kurrë më parë, kanë thelluar raportet fqinjësore. Qeveria e Kosovës mirëpret zhvillimet demokratike në Maqedoni të Veriut si dëshmi e perspektivës evropiane të partnerit dhe aleatit,” përfundon Kurti.
Fitoret e VLEN-it nuk janë thjesht një sukses politik, por edhe një mesazh i qartë për qeverisje të ndershme, reforma dhe bashkëpunim fqinjësor në rajon.
