Ndërkombëtarët janë hedhur në sulm për t’i dhënë fund tensioneve në veri të Kosovës. Prej 4 ditësh ka pasur tensione në komunat me shumicë serbe dhe të gjithë bëjnë fajtor Albin Kurtin.
SHBA i dha atij ultimatum që të tërhiqet nga provokimet, por kryeministri e ka bërë të qartë se nuk do ndryshojë kurs. Për këtë arsye ka hyrë në lojë Franca, e cila mësohet se po negocion një takim mes Vjosa Osmanit dhe Aleksandër Vuçiç, duke lënë në hije Kurtin.
Presidenti i Francës Emmanuel Macron, të mërkurën, në Bratislavë të Sllovakisë ka fajësuar autoritetet kosovare për tensionet, teksa ka paralajmëruar një takim mes Presidentëve të Kosovës e Serbisë në Moldavi, ditën e enjte.
Macron ka njoftuar se shpreson se do t’i takojë dy presidentët e Kosovës dhe Serbisë. Vjosa Osmani, tashmë ka udhëtuar për në Kishinau të Republikës së Moldavisë ku do ta përfaqësojë Republikën e Kosovës në samitin e dytë të Komunitetit Politik Evropian (EPC).
“Kreu i shtetit francez tha se shpreson të shohë presidentët e Kosovës dhe Serbisë “së bashku” të enjten, në margjinat e bisedimeve në kryeqytetin moldav, Kishinau” ka njoftuar AFP.
“Shumë qartë, është përgjegjësia e autoriteteve të Kosovës për situatën e tanishme dhe dështimin e respektimit të një marrëveshje, e cila megjithatë ishte e rëndësishme dhe është arritur pak javë më parë”, ka thënë Macron.
Kryeministri Kurti ka udhëtuar në Bratislavë, ku ka konfirmuar gatishmërinë për t’u takuar me Presidentin e Serbisë. Por, Vuçiç e ka anuluar udhëtimin atje. Si duket Franca ka futur në lojë Osmanin.
