VMRO-DPMNE ka vazhduar me fushatën anti-BDI dhe duke paralajmëruar se subjektin shqiptar përfundimisht do ta nxjerr nga pushteti.
Kryetari i partisë opozitare maqedonase, Hristijan Mickoski përsëriti sot se kushti i parë që si parti të bëhen pjesë e Qeverisë gjithëpërfshirëse për të miratuar ndryshimet kushtetuese është largimi i BDI-së nga Qeveria.
Ai nënvizoi se dëshirojnë ta çlirojnë Maqedoninë nga BDI.
“Ne thamë kemi kushte, kushti i parë është që përfundimisht Maqedoninë ta çlirojmë nga BDI, nuk ka nevojë që të jetë pjesë e asaj, kushtimisht thënë, Qeverie të përkohshme. Dhe unë e përshëndes veprimin e z.Bujar Osmanit që e pranoi këtë në emrin e BDI-së, që mos të jenë pjesë e Qeverisë së përkohshme deri në zgjedhje, më pas qytetarët do të tregojnë nëse do të jenë ose nuk do të jenë në ndonjë qeveri të ardhshme”, deklaroi Mickoski.
Por nga BDI dje thanë se janë të gatshëm të pranojnë kërkesën e VMRO-së, nëse i voton ndryshimet kushtetuese dhe nëse këtë e bën para se vendi të shkoj në zgjedhje.(INA)