Gjatë një bashkëbisedimi me studentët shqiptarë në Shkup, Presidenti i Shqipërisë, Ilir Meta, është pyetur nga të rinjtë, përse nuk reagon Tirana zyrtare për situatën e shqiptarëve të Maqedonisë dhe për rastet e montuara gjyqësore ndaj tyre. Meta, në përgjigjen e tij ka thënë se në Shkup nuk ka ardhur për të qortuar dikë apo për të bërë vlerësime për standardet e drejtësisë në RMV. Ai është shprehur se të gjitha shqetësime e tyre, zyrtarët nga Tirana ia përcjellin kolegëve në Shkup, shkruan gazeta LAJM.
“Unë nuk jam këtu për të kritikuar, për të qortuar. Ne jemi këtu për të ngritur frymën e bashkëpunimit dhe mirëkuptimit. Unë kuptoj që ka probleme me drejtësinë këtu por mos mendoni se ne në Shqipëri jemi një shembull i drejtësisë së kulluar, kemi edhe ne probleme mjaftë serioze. Kemi qenë tre vjet pa gjykatë kushtetuese. Nuk jam këtu për të marrë përsipër të bëjë gjykime për standardet e drejtësisë në Maqedoni, por shpresoj dhe besojmë që edhe Bashkimi Evropian edhe partnerët tjerë ndihmojnë dhe asistojnë. I bëjnë këto assistime dhe ne natyrisht kur kemi shqetësime të caktuara ua kemi përcjell, ua përcjellim autoriteteve”, është shprehur Meta.