Njihuni me Policin e ri të Kosovës, Andi Vranja, djaloshin që në mes të ‘ëndrrës amerikane’ dhe Kosovës, zgjodhi Kosovën!
Amerika është ëndërra e shumë të rinjëve të Kosovës e më gjerë! Ata që shkelin këtë tokë të bekuar e “pijnë ujin” e saj, vështirë se kthehen më nga kanë ardhur.
Megjithatë, disa e bëjnë të pamundurën. Mund të jenë të paktë, por janë. Andi kaloi një kohë (të shkurtë, por produktive) në SHBA e edhe në Kanada, ku e kishte mundësinë të vazhdojë të punojë e jetojë; të shijojë ‘ëndrrën amerikane.’
Por ai, përkundër të gjithave, e zgjodhi ëndrrën e vet, e zgjodhi Kosovën, e zgjodhi pasionin e tij për t’i shërbyer atdheut e kombit, dhe sot e dha betimin e Policit të Kosovës. Ai sot nuk është vetëm një polic i ri i shtetit, por një shpresë e re! Është simbolika e atdhedashurisë dhe e vullnetit të hekurt për t’i qëndruar gardian Republikës e qytetarëve të saj.
Shtatlartë e i vendosur, fjalëpak por punëtor, i urtë por i pakompromis në principe, Andi është shembull që na bënë krenar!
Andit i uroj nga zemra që realizimi i ëndrrës së tij kosovare të bëhet ogurbardhë për të gjithë koleget e kolegët e tij në shërbim të vendit! Suksese e shëndet për Andin dhe të gjithë policët e ri të Kosovës që sot morën mbi supe përgjegjësinë për të ruajtur rendin e ligjin, për ta ruajtur e mbrojtur Republikën e Kosovës dhe të gjithë qytetarët e saj! Krenar me ty!
Shkruan: Faton Bislimi