Doganierët gjermanë të njësisë së kontrollit në Lindau, të martën e kaluar kanë kapur vozitësin e një autobusi kosovar në autostradën 96 afër vendparkimit Humbrechts, teksa kontrabandonte mallra të ndryshme nga Zvicra.
54-vjeçari kishte në valixhe lodra për fëmijë, rrobe të markave të njohura dhe trapana me vlerë gati 4 000 euro. Ai është dashur të dërgojë mallin nga Zvicra në Kosovë në emër të palës së tretë. Ai nuk kishte dokumente doganore, informon portali Shtegu. Më pas, doganierët kanë nisur procedurën kundër vozitësit të autobusit dhe i kanë ngarkuar 900 euro detyrime importi dhe 400 euro garanci, të cilat i ka paguar në vend me kartelë krediti. Pas kësaj ai ka mundur të vazhdojë udhëtimin e tij.
Qysh të hënën, doganierët gjermanë kishin ndaluar një vozitës autobusi i cili kishte sjellë mallra nga Zvicra në doganën e BE-së, pa pagesë.
