Ministria e Jashtme e Maqedonisë së Veriut dje papritur dha lajmin se në hotelin spa “Rajska Banja” (Banja e Parajsës) pranë Manastirit të Banjskës në Zveçan ishin gjetur edhe shtatë shtetas të saj.
Por kush ishin ata?! MPJ sot ka dhënë informacione të përgjithshme se shtatë shtetasit janë kthyer pas verifikimeve dhe bisedës me autoritetet kosovare të sigurisë. MPJ nuk ka dhënë asnjë detaj tjetër, duke bërë të ditur se bëhet fjalë për persona jopublik.
Por, nga ana tjetër, siç mëson INA nga burime të saj, bëhet fjalë për tre çifte nga Maqedonia e Veriut, ku mes tyre ka qenë edhe në fëmijë. Nuk zbulohen detaje tjera për identitetin e tyre, por siç bëhet e ditur ata ishin për pushime në hotelin spa, që njihet edhe me banjën e shërueshme për sëmundje të ndryshme.
Por, nuk dihet pronësia e këtij objekti hotelierik, që në fillim të vitit 2019 ishte promovuar nga drejtori i asaj kohe i zyrës për Kosovën në Serbi, Marko Gjuriq, por që nuk dihet se kush qëndron pas këtij investimi. Në këtë banjë vitin e kaluar ishte për vizitë edhe kryeministrja e Serbisë, Ana Bërnabiq, por dyshohet se aty kalojnë pushimet edhe krerë të tjerë të Listës Serbe dhe politikës serbe, pasi që janë parë në fotografitë e banjës të shpërndara në rrjetet sociale. (INA)