Opozita shqiptare e përbërë nga Lëvizja BESA, Alternativa dhe Lëvizja Demokratike në kuadër të koalicionit Lëvizja për Ndryshim sot pritet që të formojnë grup parlamentar në Kuvend.
Ky bashkëveprim do të bëhet i ditur në një konferencë për media të caktuar për ditën e sotme ku do të jenë të pranishëm, Bilall Kasami, Afrim Gashi dhe Izet Mexhiti. Ata pritet të formalizojë bashkëpunimin edhe në Kuvend duke formuar grup parlamentar.
Për këtë vendim kreu i Kuvendit do të informohet zyrtarisht të hënën kurse ky hap ishte paralajmëruar kohë më parë nga të tre partitë e Lidhjes Evropiane për Ndryshim.
Konfirmimi për Alsat vjen edhe nga kreu i Besës, Bilall Kasami. “Të hënën do të publikohet grupi parlamentar në Kuvend. Presim që me këtë të ecim edhe një hap më shumë dhe më përpara drejt homogjenizimit të opozitës, drejt faktorizimit të votës opozitare, drejt ngritjes dhe përforcimit të zërit opozitar në Kuvend, me çka vlerësojmë që votuesi opozitar do të jetë më i sigurt në votën e tij për ndryshim dhe rrotacion politik”, u shpreh Bilall Kasami, kryetar i Lëvizjes Besa.
Lëvizja Evropiane për Ndryshim numëron deri 6 deputet: 3 deputetë nga Lëvizja Demokratike, 3 deputetë nga Alternativa dhe 1 deputet nga Lëvizja BESA. Por nuk dihet ende se si do të veprojë deputeti i Alternativës, Hysni Ismaili. (INA)