Në mbledhjen e fundit të Këshillit të Sigurimit të Kombeve të Bashkuara, dëshmitarja e dhunës seksuale gjatë luftës në Kosovë, Vasfije Krasniqi-Goodman, ishte përfaqësuese së bashku me presidenten Vjosa Osmani.
Ajo për emisionin Rreth e Rrotull ndau detaje për përballjen e presidentes Osmani me presidentin serb Aleksandër Vuçiq dhe kërkesën e saj për të kërkuar falje publikisht për krimet e luftës në Kosovë.
Osmani përfaqësoi Kosovën së bashku me tri heroinat tjera të mbijetuarat e luftës së fundit në Kosovë, Fahrije Hotin, Elhame Muçollin dhe Shyrete Tahirin.
Krasniqi – Goodman ka komentuar reagimin e tensionuar të presidentit serb kur ka parë prezencën e dëshmitareve të luftës në Kosovë.
“Takimi ka shkuar shumë mirë, momenti ..kur ka kuptuar Vuciq se i ka dëshmitaret në dhomë, reagimin e tij nuk mund as ta përshkruaj. Rusia dhe Serbia ishin ato dy shtete që kishin probleme. Osmani ka qenë e mrekullueshme, edhe mesa besoj unë është e hera e parë që një president i Kosovës ka pasur dëshmitarët e luftës në OKB aty në pranin me vete”, ka thënë ajo.
Pse s’u lejua të hynit fillimisht?
“Nuk e kam të qartë pse nuk na lejuan. Dy herë na kanë thënë se ‘bexhat’ nuk po funksionojnë që të hynë brenda, por ne arritëm të hymë sepse presidentja u tha se nuk hy brenda e mbaj fjalimin jashtë dhe nuk hynë pa dëshmitarët brenda. Po, ne i kemi paralajmëruar se do të jemi aty”, ka deklaruar ajo.
Me prezencën dhe fjalimin e presidentes si ndiheshit?
“Fjalën e fundit kur presidentja ia tha Vuciqit për me kërku falje për krejt krimet e luftës që janë bërë në Kosove ka qenë momenti më i mirë për të gjitha neve katër dëshmitarët që kemi qenë aty. Se ne e kemi pritur këtë ditë që një lider i joni të ia thotë Vuçiqit përballë që të kërkojë falje për të gjitha krimet që janë kryer në Kosovë”, ka thënë ajo.
