Raportet në mes të Kosovës dhe Serbisë vazhdojnë të mos jenë të qëndrueshme. Mos qëndrueshmëria e raporteve si dhe stërvitjet ushtarake të vazhdueshme të Serbisë ndikojnë në shqetësimin e shumë ekspertëve se Serbia mund ta pushtojë Kosovën, shkruan Bota Sot.
Lidhur me rrezikun që Serbia ta pushtojë Kosovën, është pyetur edhe komandanti i KFOR-it, gjenerali Ozkan Ulutash, i cili thotë se KFOR-i është i fokusuar në misionin e tij afatgjatë të bazuar në një mandat të qartë të OKB-së.
“Dhe kjo është të sigurojë një mjedis mbrojtës dhe të sigurt për të gjithë njerëzit që jetojnë në Kosovë dhe lirinë e lëvizjes; në çdo kohë dhe në mënyrë të paanshme. Prandaj, ne vazhdimisht monitorojmë të gjitha zhvillimet relevante që mund të ndikojnë në sigurinë në mbarë Kosovën dhe stabilitetin rajonal. Ne jemi të përkushtuar që parandalimi i çdo KFOR-i ka burime të mira dhe është i krijuar për t’u përballur me të gjitha sfidat që mund të ndikojnë në mjedisin e sigurisë, në përputhje me mandatin tonë të OKB-së”, thotë komandanti i KFOR-it.
Gjersa, KFOR-i dhe organet e sigurisë janë duke punuar për një situatë stabile, Serbia në anën tjetër nuk po i ndalë stërvitjet ushtarake.
Ditë më parë, kryeministri i Kosovës, Albin Kurti, ka publikuar video ku shihen ushtarët serbë duke u stërvitur me dronë luftarak kamikaz 30 kilometra afër kufirit me Kosovën.
Sipas Kurtit, kjo është dëshmi që Serbia është aktori kryesor i përpjekjeve destabilizuese për rajonin e Ballkanit Perëndimor.
“Kjo është edhe një dëshmi që Serbia është autoriteti, instanca, faktori, aktori kryesor i përpjekjeve destabilizuese për rajonin e Ballkanit Perëndimor dhe paraqet kërcënim edhe për Republikën tonë të cilën nuk e njeh, por edhe për sigurinë e të gjithë qytetarëve në rajonin tonë. Ushtrimi që po bëhet në Peshtër të Sanxhakut, pra paraqet kërcënim, ndërkaq në anë tjetër, paraqet edhe ndotjen më të madhe të ajrit e tokës në Sanxhak”, ka thënë Kurti.
Kurse, sipas KFOR-it, kjo është një stërvitje vjetore për të cilën janë të njoftuar madje është ftuar komandati Ozkan Utulas për t’i vëzhguar stërvitjet. Megjithatë nga KFOR-i thonë se vazhdojnë t’i monitorojnë të gjitha zhvillimet që mund të ndikojnë në sigurinë e Kosovës dhe stabilitetin në rajon.
Duke komentuar stërvitjet ushtarake serbe në kufi me Kosovën, publicist Zlatoje Martinov, thotë se ka mundësi që të kërkohet një provokim i ri.
Martinov përmend edhe gjoja vrasjet dhe persekutimin intensive të serbëve për të nisur një fushatë të fortë propaganduese kundër Kosovës.
“Serbia jo vetëm që kryen stërvitje ushtarake në afërsi relative të kufirit me Kosovën, por sipas dëshmisë së Rada Trajkoviqit, Milan Radojçiq, i cili kreu një sulm terrorist në Kosovë në shtator të vitit të kaluar, nuk ndiqet penalisht dhe nuk ndiqet penalisht në burg, por me policët serbë të arratisur me Kosovën po krijon një lloj paraushtarake rreth kufirit të Kosovës me qëllime (deri tani) të paqarta. Ka mundësi që të kërkohet një provokim i ri, aq më tepër që këto ditë në mediat shtetërore në Serbi ka nisur një fushatë e fortë propagandistike kundër Kosovës, për gjoja vrasjet dhe persekutimin intensiv të serbëve. Ata ndoshta duan të dramatizojnë situatën, për të shmangur ndonjë marrëveshje me Albin Kurtin, i cili quhet emrat më të këqij këtu”, shprehet publicisti.
Ai shton se nuk beson që Serbia dëshiron luftë.
“Nuk besoj se dëshirohet lufta sepse Serbia do të përballej me një përgjigje të rrezikshme nga aleanca e NATO-s, por nuk përjashtoj provokimet, sepse edhe Rusia dëshiron të ngrejë tensione në Ballkanin Perëndimor”, pohon Martinov./Bota Sot
