Sekretari amerikan i Shtetit, Anthony Blinken, sot do të vizitojë sot për herë të parë Shqipërinë.
Një ditë përpara se të marrë pjesë në konferencën e sigurisë në Mynih, zyrtari amerikan do të ndalet për disa orë në Tiranë, për t’u larguar po atë ditë nga vendi ynë.
Kryeqyteti i ka bërë të gjitha përgatitjet për të pritur zyrtarin e lartë amerikan, teksa rrugët janë veshur me flamuj amerikanë dhe një poster gjigant i sekretarit amerikan të shtetit është shpalosur tek Universiteti Politeknik.
Euronews Albania ka mësuar se në vizitën e tij të parë në kryeqytetin shqiptar, Blinken do të takohet me kryeministrin Edi Rama, nga ora 16:00-19:00 me të cilin më pas do të ketë një konferencë për shtyp.
Ndërkohë, Policia e Shtetit ka publikuar planin e masave që është ndërmarrë për të mbarëvajtur vizitën në Tiranë të Sekretarit Amerikan të Shtetit.
Plani i masave parashikon bllokimin e një sërë rrugëve në kryeqytet si dhe ndalimin e parkimit në to duke filluar nga mbrëmja e kësaj të mërkure.
Duke filluar nga ora 19:30 e kësaj të mërkure deri në orën 20.00 të datës 15.02.2024, në rrugët “Faik Konica”, “Dervish Hima”, “Ismail Qemali” (para Kryesisë së Kuvendit), “Gjergj Filipi”, “Lek Dukagjini”, Rruga e Elbasanit, “Papa Gjon Pali II”, bulevardi “Bajram Curri”, bulevardi “Dëshmorët e Kombit”, si dhe rruga “Ukraina e Lirë” (Gjykata Kushtetuese), do të ndalohet parkimi i mjeteve në rrugë dhe në hapësirat e caktuara për parkim.
Më poshtë gjeni të listuara dhe rrugët interurbane dhe urbane ku pritet të ndalohet qarkullimi gjatë fashave orare 09:30-12.30 dhe 17:30-20.00 të së enjtes
▪️Ndalim qarkullimi:
Interurbane dytësore Fushë Prezë-Rinas;
Interurbane dytësore Rinas-Qafë Kashar dhe anasjelltas;
Interurbane kryesore Qafë Kashar – ish-sheshi Shqiponja dhe anasjelltas;
Interurbane kryesore ish-sheshi Shqiponja-Teg-Sanatorium dhe anasjelltas;
Rruga e Elbasanit, rruga “Dervish Hima”, rruga “Faik Konica”, rruga “Papa Gjon Pali II”, rruga “Ismail Qemali”, rruga “Themistokli Germenji”, rruga “Abdyl Frashëri”, rruga “Ukraina e Lirë”, rruga “Gjergj Filipi”, bulevardi “Dëshmorët e Kombit” dhe bulevardi “Bajram Curri”.
