Shkruan: Arben FETAI
E pamatur dhe panevojshëm tensionuese deklarata e kryeministrit Kovaçevski se retorika e Bullgarisë ndaj Maqedonisë së Veriut është e ngjashme me atë të Rusisë ndaj Ukrainës.
Maqedonia e Veriut nuk është në pozitë t’i mbajë askujt leksione për demokraci dhe orientim pro-perëndimor, e aq më pak një vendi anëtar të Natos dhe BE-së që është rreshtuar në anën e duhur të historisë. Kushtet për hapjen e negociatave i kemi pranuar, tash duhet punuar për t’i zbatuar e jo sulmuar Bullgarinë dhe BE-në, sepse kjo është thjesht kundërproduktive.
Nëse megjithatë, kryeministri dëshiron të ballafaqohet me bullgarët, le t’a bëjë në kuadër të forumeve ndërpartiake evropiane me partinë simotër të SDSM-së, PS-në bullgare e cila është ndër më të ngarkuarat ideologjikisht kundër hapjes së negociatave të RMV-së dhe kundër sanksioneve ndaj Rusisë.
Por para se të dalë jashtë kufijve me analogji ala Levica, Kryeministri është mirë të tregojë se cilës retorikë i kontribuon partia e tij kur thonë se nuk është koha për heqjen e 20% dhe thirrjen e gjuhës shqipe në emër, kur hesht karshi thirrjeve “dhoma gazi për shqiptarët” apo “shqiptari i mirë është shqiptar i vdekur” apo edhe karshi mbajtjes në burg dhe vdekjes në qeli të shqiptarëve të pafajshëm të cilëve u janë montuar raste të denja vetëm për Rusinë e Putinit, përfshirë nga zyrtarët e partisë së tij. Kryeministër, fshij para derës tënde para se të dalësh në kojshi.
* Arben Fetai, drejtor i Instituti për Politika Publike (IPP) Arbën Xhaferi
