Shkruan: Medai Shaholli
Ashtu siç kam parashikuar në opininin tim dy ditë më parë se loja me presidentin shqiptar merr fund ditën e mërkurë të 24 prillit, pikërisht ashtu ndodhi mbrëmë, ku të dy kandidatët shqiptarë ikin nga kjo garë me bisht ndër shalë si një bast i humbur dhe i parapërcaktuar qysh më parë nga balanca e votës që anon nga kampi maqedon.
Sepse qëllimi i vërtete i kësaj gare ishte matje e pulsit të elektoratit shqiptar si testim për zgjedhjet parlamentare, ku me fitoren e mbrëmëshme të zotit Osmani nga Fronti Europian përballë z.Taravari nga opozita VLEN, me afro 40 mijë vota diferencë për Frontin Europian, ata tashmë janë çliruar nga stresi dhe ndihen si favorit në zgjedhjet e 8 majit kundrejt opozitës VLEN.
Pra, gara e vërtetë janë zgjedhjet parlamentare të 8 majit, ku brenda kampit shqiptar do të ndeshen për së dyti Fronti Europian dhe opozita VLEN, për ta dëshmuar përfundimisht se cila nga ato do të jetë fituese e këtyre zgjedhjeve dhe kush do t’i humbas ato.
Urojmë që dy taboret shqiptare në garë të tregohen të denja para elektoratit shqiptar me qëndrimet e tyre ndaj qeverisë së ardhshme të koalicionit, mbi identitetin e mohuar të gjuhës shqipe në kushtetutën e vendit e cila qëndron aty si gur varri për shqiptarët.
Shpresojmë se cilido koalicion që i fiton zgjedhjet mos bëjë pazare dhe lojëra politike mbi kurrizin e shqiptarëve por, të kthjellohen dhe të kthehen me këmbë mbi tokë për ta parë realitetin në sy se pa heqjen e njollës së turpit siç është 20% nuk ka të ardhme kjo “drzhavë”, në të kundërtën do të konsiderohen si subjekte vasale të pushtetit dhe antishqiptare.
