Bashkimi Europian ka shpallur një kufi tjetër kohor për hyrjen në fuqi të sistemit të ashtuquajtur ETIAS, që të huajt para se të udhëtojnë në vendet e BE-së, duhet të paguajnë një taksë udhëtimi prej 7 eurove.
Mesi i vitit 2025, është publikuar si afati për fillimin e aplikimit të këtij rregulli i cili prek rreth 1.4 miliardë njerëz nga mbi 60 vende të përjashtuara nga viza.
Kjo skemë është e ngjashme me atë të Shteteve të Bashkuara të Amerikës, ku udhëtarët para mbërritjes në tokën amerikane plotësojnë ESTA.
Ky është një sistem i sigurisë kufitare të BE-së, një sistem i automatizuar që, në të ardhmen, do të regjistrojë udhëtarët nga vendet e botës jashtë BE-së, ndër ta edhe nga Shqipëria sa herë që kalojnë një kufi të jashtëm të BE-së.
Çdo shtetas nga vendi ynë dhe shtete të tjera jashtë BE-së do të mund ta bëjë aplikimin online aplikim që do të jetë i vlefshëm për 3 vjet kundrejt pagesës së një shume prej 7 eurosh. Në këtë aplikim online ata që duan të udhëtojnë drejt zonës Shengen duhet që të vendosin para nisjes të dhënat e tyre biometrike dhe në pak minuta ju vjen përgjigja në adresën e tyre e-mail.
Kjo presupozon kontrolle shtesë të sigurisë përpara se të lejohen të hyjnë në BE.
Për të aplikuar për këtë autorizim kur ai të kërkohet para udhëtimit drejt BE-së, siç bëhet e ditur deri tani, ajo që duhet, do të jetë një dokument i vlefshëm udhëtimi në të cilin mund të vendoset një vizë. Dokumenti i udhëtimit nuk duhet të skadojë në më pak se tre muaj dhe nuk duhet të jetë më i vjetër se 10 vjet.
Afati i hyrjes në fuqi të këtij sistemi ETIAS është shtyrë disa herë që nga viti 2016 kur u propozua për herë të parë nga Komisioni europian.(INA)