Në seancën e sotme të Kuvendit të RMV-së në rend dite do të jetë projektligji për amnistinë e personave të dënuar për ngjarjet e 27 prillit 2017, si dhe projektligji për amnisti, të dy me procedurë të shkurtuar.
Grupi parlamentar i VMRO-DPMNE-së ka dorëzuar këtë projektligj. Sipas koordinatorit të grupit parlamentar të partisë opozitare VMRO-DPMNE, Micevski, ky projekt-ligj është rezultat i iniciativës dhe angazhimit të përbashkët të avokatëve Janaki Mitreski dhe Dragan Peshevski dhe të gjithë grupit parlamentar të VMRO-DPMNE-së dhe koalicionit.
“Është shumë e rëndësishme të theksohet se është vetëm një vazhdimësi e Ligjit të mëparshëm për amnistinë i cili është miratuar në dhjetor të vitit 2018, por me një korrigjim të madh dhe thelbësor, që është tejkalimi i selektivitetit dhe drejtësisë selektive që ka rezultuar nga ligji i miratuar në vitin 2018”, theksoi Micevski.
Me këtë ligj, theksoi ai, do të mbulohen pa përjashtim të gjithë personat e dënuar për ngjarjet e 27 prillit.
Në rend dite do të jetë edhe për sigurime shëndetësore, si dhe projektligji për plotësimin e ligjit për barnat dhe pajisjet mjekësore, të dy në procedurë të shkurtuar, si dhe projekt-ligje të tjera.(INA)
