Një familje tetovare akuzon se anëtari i tyre ka ndërruar jetë dje në korridorin e spitalit të Tetovës duke pritur që të vijë mjeku.
Bëhet fjalë për një gjashtëdhjetë vjeçar nga fshati Pirok, të cilin familjarët e tij e kanë sjellë në spital rreth orës 19:00. Njëri prej tyre thotë se kanë kërkuar ndihmë nga stafi për një orë, por, sipas tyre, askush nuk ka dalë në kohë për t’u kujdesur për pacientin që ndërkohë kishte rënë në koma.
“Një orë pritëm poshtë, kërkuam ndihmë, askush nuk doli të na ndihmojë. Familjari ka rënë në koma para një ore, kemi pritur poshtë, asnjë mjek nuk ka dalë të na ndihmojë, pas një kohe ka ndërruar jetë nga vonesa e mjekëve mbi gjysmë ore”, thotë për kanal5, familjar i pacientit të ndjerë.
Drejtori i Spitalit Pllumb Vela dhe Ministria e Shëndetësisë, përmes deklaratave të njëjta, mohojnë pretendimet e familjes së 60-vjeçarit se ai nuk është përkujdesur në mënyrë adekuate dhe në kohë.
“Sipas informacioneve fillestare, me të mbërritur në urgjencë, pacienti është referuar menjëherë në bllokun internist. Mjeku që e priti e shoqëroi në katin e parë, ku i ka bërë EKG-në dhe është konstatuar se pacienti kishte sulm kardiak. Pas tentativave për reanimim është konstatuar vdekja”, thonë nga këto institucione, duke shtuar se Inspektorati Shtetëror Sanitar Shëndetësor do të bëjë kontroll të plotë për këtë rast.(INA)
