Mikel Arteta ka dërguar një mesazh urimi për trajnerin e Bayer Leverkusenit, Xabi Alonson dhe mesfushorin Granit Xhakën, pas triumfit të tyre në Bundesligë.
Alonso dhe ish-ylli i “Topçinjve”, Xhaka ndihmuan Leverkusenin për titullin e parë të Bundesligës, duke përfunduar detyrën me pesë ndeshje të mbetura, pasi ata fituan 5-0 kundër Werder Bremenit të dielën për të ruajtur sezonin e tyre të pamposhtur.
Arteta u pyet nëse ai iu drejtua ish-bashkëlojtarit të tij Alonsos për ta uruar dhe nëse ai ka marrë ndonjë këshillë se si të mundë Bayern Munichun, me të cilin skuadra londineze do të përballet të mërkurën në ndeshjen e dytë të ndeshjes së tyre çerekfinale të Ligës së Kampionëve.
“Urime të mëdha për Xabin dhe Granitin pasi ai ishte edhe lojtari ynë”, u tha Arteta gazetarëve.
“Shumë i lumtur për ta dhe shumë i impresionuar me atë që kanë bërë. E urova Xabin padyshim sepse jemi miq të mirë dhe sepse jemi të lumtur për ta, por kjo është një histori tjetër. Ne nuk përballemi rregullisht me Bayernin dhe është një ndeshje e Ligës së Kampionëve, kështu që loja është shumë e ndryshme”. /Zëri
