Sergi Roberto ka mundësinë të vazhdojë te Barça edhe për një sezon (do të ishte i pesti i tij si blaugrana). Pas rekomandimit që Xavi dha publikisht, gjithashtu në takimet me drejtuesit, klubi katalanas ka njoftuar tashmë synimin për të negociuar rinovimin e kontratës së tij, siç mësoi “Mundo Deportivo”. Negociatat do të fillojnë në javët në vijim.
Sergi Roberto, i cili bëri debutimin e tij zyrtar me Barçën në nëntor 2010, në një ndeshje të Kupës së Mbretit, del lojtar i lirë në qershorin e ardhshëm. Përtej mendimit të trajnerit Xavi, klubi është i kënaqur jo vetëm me performancën e tij, ndonjëherë thelbësore si kundër Almerías, Las Palmas apo Napolit, por edhe me përgjegjësinë që merr si kapiten dhe mënyrën se si e zbaton atë.
Drejtuesit vlerësojnë përfshirjen e tij, lidershipin në dhomat e zhveshjes dhe ndjenjën e përkatësisë. Për të qëndruar te Barcelona këtë sezon, Sergi Roberto e uli ndjeshëm pagën e tij në përputhje me ‘fair play financiar”. Çështja ekonomike do të jetë “kali i betejës” për rinovimin, sepse klubi fillimisht do t’i ofrojë një vit të vetëm, me të njëjtën pagë.
Vetë lojtari, i cili mendon se mund t’i japë ende skuadrës së Barçës, ka përsëritur në më shumë se një rast se dëshiron të vazhdojë, por gjithashtu do të donte të dinte mendimin e trajnerit të ri, qoftë Xavi apo një tjetër, sepse kurrë nuk dëshiron të jetë problem për entitetin.
Sergio Roberto është tërhequr edhe nga ideja për të ndjekur rrugën e shokëve të tij si Messi, Luis Suarez apo Busquets në MLS. Ai e kupton se është ende herët për të provuar fatin në futbollin amerikan. Lojtari nga Reus ka luajtur 17 ndeshje zyrtare këtë sezon, në të cilat ka shënuar 3 gola dhe ka dhënë 2 asiste.