Përfaqësuesit e lartë të Bashkimit Evropian (BE), Zhozef Borel dhe Oliver Varhej dje mbërritën në Shkup, për të mbajtur takimin e 16-të të Këshillit të Stabilizim-Asocimit ndërmjet BE dhe Maqedonisë së Veriut, por që për herë të parë zhvillohet në Shkup.
Në seancën e përbashkët do të diskutohet për statusin e reformave, progresin në integrimet evropiane dhe marrëdhëniet bilaterale në kuadër të Marrëveshjes së Stabilizim Asociimit.
Borel do të takohet me krerët shtetëror dhe të partive politike, ndërsa të shtunën në Ohër do të mirëpresë presidentin serb Aleksandar Vuçiq dhe kryeministrin e Kosovës Albin Kurti, të cilët duhet të diskutojnë planin për normalizimin e marrëdhënieve ndërmjet Beogradit dhe Prishtinës.
“Roli im është të lehtësoj dialogun. Ne do të vazhdojmë t’i ndihmojmë ata me aq sa mundemi, por në fund të fundit u takon atyre të marrin vendimet. Vetëkuptohet se një rezultat i suksesshëm i këtij dialogu do të ketë një ndikim shumë pozitiv në të gjithë rajonin”, theksoi Borel në lidhje me takimin mes presidentit serb dhe kryeministrit të Kosovës këtë fundjavë në Ohër. (INA)
