Nënkryetari i BDI-së dhe njëri nga prijësit e fraksionit brenda këtij subjekti, Izet Mexhiti ka komentuar ftesën publike të kreut të Lëvizjes BESA, Bilall Kasami për një front të fuqishëm opozitar, përfshirë edhe fraksionin e BDI-së, për fitoren në zgjedhjet e ardhshme.
Kasami ftoi fraksionin ti bashkohet frontit të tyre dhe të shkëputet nga BDI. Megjithatë, Mexhiti në një prononcim për TV21 nuk ka sinjale për një bashkëveprim.
“Urojmë konsolidimin e opozitës shqiptare. Ne e vazhdojmë betejën fuqishëm brenda BDI-së”, tha Mexhiti për TV21.
Kryetari i Lëvizjes BESA, Bilall Kasami bën thirrje për unitet dhe front opozitar duke i bërë thirrje fraksionit të BDI-së dhe grupit parlamentar dhe anëtarësisë së ASH-së me frymë opozitare.
“Dje u hodh hapi i parë i bashkëpunimit dhe unifikimit të opozitës shqiptare. Si kryetar i Lëvizjes BESA i shtriva dorën e bashkëpunimit Afrim Gashit dhe pas shkëputjes përfundimtare të fraksionit të BDI-së do të shtrijë dorën e bashkëpunimit unifikues edhe atyre. I bëj ftesë korrekte dhe të sinqertë grupit parlamentar dhe gjithë anëtarësisë së ASH-së me orientim opozitar që t’i bashkëngjitet frontit opozitar, sepse ata gjithmonë kanë qenë për ndryshim në kampin politik shqiptar dhe për ta rrëzuar BDI-në”, thuhet në thirrjen e Kasamit.(INA)
