Kryetari i Lëvizjes Besa, Bilall Kasami ka deklaruar sonte në Klan Debat se Aleanca për Shqiptarët po përgatit votuesit dhe anëtarësinë e saj, për një koalicion të ardhshëm me BDI-në për zgjedhjet parlamentare.
Kjo parti, sipas Kasamit, ka degjeneruar dhe ka zhgënjyer simpatizuesit e saj, duke shpëtuar, sipas tij, BDI-në dhe qeverinë e saj.
“Ata po përgatisin votuesit që eventualisht nesër në zgjedhje të rregullta apo të parakohshme të shkojnë me lista të përbashkëta me BDI-në”, deklaroi mes tjerash Bilall Kasami.
Por sipas tij, me refuzimin për heqjen e “20 përqindëshit” në këto ndryshime kushtetuese, BDI sipas Kasamit, po i tregon edhe partnerit të saj në qeveri se kush është lideri e kush vendos për politikën shqiptare në Maqedoni. Kjo sepse sipas Kasamit, përkundër deklarimeve të ministrave të ASH-së dhe kryetarit të saj, Artan Grubi dhe krerët e BDI-së e kanë treguar qartë, se në këtë hapje të Kushtetutës, nuk do të diskutohet për “20 përqindëshin”.
“Unë vlerësoj se është inat edhe ndaj opozitës, por më shumë është inat ndaj partnerit shqiptar të koalicionit”, tha mes tjerash Kasami në Klan Debat.
