LSDM dhe BDI përmes komunikatave në sinkron kanë bërë me dije se SHBA-të i kanë dërguar mesazh të qartë VMRO-DPMNE-së lidhur me nevojën për ndryshimet kushtetuese.
“SHBA-të i dërguan mesazh të qartë VMRO-DPMNE-së që të mbështesë rrugën evropiane të shtetit, që opozita të tregojë përkushtimin e saj për arritjen e qëllimit strategjik dhjetëvjeçar të anëtarësimit në Bashkimin Evropian. Mesazhi i SHBA-së në mbështetje të së ardhmes evropiane të vendit vjen në kohën kur procesi i skriningut është duke u zhvilluar me sukses, dhe në Kuvendin e Maqedonisë nevojiten hapa për vazhdimin e negociatave me BE-në deri në anëtarësimin e plotë. Tashmë është formuar një grup pune ekspertësh për tekstin e amendamenteve për ndryshimet e nevojshme kushtetuese si një nga hapat. Për herë të parë bllokimi i rrugës evropiane vjen nga brenda vendit, koalicioni VMRO-DPMNE – Levica janë të vetmet që janë kundër BE-së dhe të ardhmes evropiane të vendit dhe qytetarëve”, thonë nga LSDM.
Edhe BDI ka theksuar se reagimi i Departamentit Amerikan të Shtetit dhe thirrja e përfaqësuesit special të SHBA-ve për Ballkanin Perëndimor, Gabriel Escobar ndaj VMRO-së dhe Levicës për të përkrahur rrugën europiane të vendit dhe për të votuar ndryshimet kushtetuese është sinjal i qartë paralajmërues që nuk duhet të hasë në vesh të shurdhër.
“Nëse deri dje thirrjet dhe kërkesat tona për konstruktivitet janë cilësuar si subjektive dhe janë shpërfillur vazhdimisht nga ana e opozitës, konfirmim për racionalitetin e tyre është mesazhi i drejtpërdrejt i SHBA-ve që t’i jepet fund bllokadës dhe pengmarrjes së të ardhmes europiane të vendit. Vlerësojmë se ka ardhur koha për reflektim nga ana e opozitës, jo vetëm në aspektin deklarativ, të dëshmojë konstruktivitet në çastet vendimtare kur duhet të përshpejtojmë hapin drejt Europës”, thekson BDI, duke shtuar se tek opozita maqedonase ka frymë europiane që do të triumfojë mbi konfuzionin dhe protagonizmin subjektiv.(INA)